Arau osoa ikusi nahi baduzu, eskuragarri dago dokumentuen atalean.

Seguru asko definizio hori aldatu egingo da laster, zenbait ñabardura egiten dituen Europako zuzentarau baten zirriborroa egin baita. Adibidez, etorkizuneko definiziotik kanpo utziko dira etxeko lan txikietako obra hondakinak, ziur asko. Baina, aurreikusita dagoenez Plana zuzentarau berria baino lehenago onartzea, oraingoz abiapuntutzat hartu behar dugu egungo definizioa. Bihar-etzi, arauetan aldaketak egin ahala, Plana berrikusten eta moldatzen joan beharko da.

Zenbat hondakin sortzen dugun, zer motatako hondakinak sortzen ditugun eta, batez ere, nola bereizten ditugun eta nola jartzen ditugun bilketa zerbitzu publikoen esku: faktore horiexen mende egongo da Planaren arrakasta.

Eta hori guztia, funtsean, gure kontsumo ohituren eta ingurumenari buruzko gure informazio eta kontzientziazio mailaren araberakoa da (oinarrizko alderdiak dira, eta Planean horiek ere kontuan hartu dira).

Ekonomia aldetik ere Planak eragin egiten dizu, hondakinen kudeaketak kostu oso handia duelako. Indarra duten arauak hitzez hitz aplikatuko balira, hondakinak sortzen ditugun herritarrok ordaindu beharko genuke kostu hori oso-osorik. Oraindik ez da horrela, zaborraren kudeaketagatik ordaintzen ditugun tasek kudeaketaren kostu osoaren zati bat baino ez baitute estaltzen.

Eta Planak eragin egiten dizu, azkenik, hondakinen kudeaketak (kudeaketa txarrak, bereziki) ondorio kaltegarriak ekar ditzakeelako (itxura zantarra, usainak, emisioak, isuriak eta abar), bai erabiltzen duzun espazio publikoan (irudia, kalitatea eta abar), bai bizi zaren ingurumenean (arnasten duzun airea, erabiltzen duzun ura eta abar) eta, horrenbestez, zure osasunean.

Hondakinen sorrerari buruzko datu zehatzak ikusi nahi badituzu, begiratu hiri hondakinen inbentario osoa, Hondakinen Behatokiaren txostenean. Webgune honetako dokumentuen atalean argitaratu dugu.

Lehenengo elementua (multzo urdina) Planaren dokumentua bera da; horren gutxieneko edukiak hondakinei buruzko araudian ezarrita daude. Planak justifikatu eta azaldu egin behar du zeintzuk diren hurrengo urteetan hondakinen kudeaketa egokia lortzeko jarriko diren neurriak; tartean, kronograma baloratu bat, argi erakutsiko duena zer egin behar den, noiz egingo den, zenbat kostako den eta nola ordainduko den.

Parte hartzearen bidez prestatzen da Plana (multzo horia), kontsulta eginez herritarrei (horretarako dago webgune hau) eta alderdi interesdunei (erakunde, GKE, enpresa, elkarte, unibertsitate, teknologia zentro eta abarrekoak, elkarrizketa, lantegi, foro eta horrelakoen bidez kontsulta egiten zaienak).

Planari erantsita, ingurumen azterlan estrategikoa dago (multzo berdea); horren edukia ere araudian ezarrita dago. Azterlan horretan deskribatzen da nola eragiten dien Planak ingurumenari eta osasunari, eta zeintzuk ingurumen neurri ezarri behar diren, eragin hori negatiboa bada, ahalik eta leunena izan dadin.

Planaren lehenengo zirriborroa prestatu eta gero, izapideak hasten dira. Izapide horietan zehar ere parte hartzeko eta kontsultak egiteko prozesua betetzen da, arauz ezarrita dagoena (multzo marroia)

Lan mahaietan biltzen gara, aldian behin deituta. Bi motatako mahaiak daude:

• Mahai teknikoak. Horietan biltzen dira goian aipatutako erakundeetako lantalde teknikoak, era guztietako gai teknikoak eztabaidatzeko. Batez ere, Planeko programei eta jarduketei lotutako gaiak dira.
• Erakundearteko mahaiak. Horietan eztabaidatzen dira Planaren alderdi estrategikoak, babes eta konpromiso politikoaren beharra dutenak (gobernamendu eredua, eskumenak, azpiegiturak, finantzaketa, zergak eta abar).

Berrien atalean eskura daukazu lan mahaien deialdi guztiei buruzko eta bakoitzean jorratutako gaiei buruzko informazioa.

Lan mahaietako kideek eskura edukitzen dituzte parte hartzeko prozesuen emaitzak, azken horiek sortu ahala. Dokumentuen orrian zuk zeuk ere aukera izango duzu parte hartzeko prozesuen emaitzen aldian behingo laburpenak kontsultatzeko.